Start Bachmann Longsom werd´s

Longsom werd´s

Die Sunn, die Sunn is endlich do. Was fer Wohltat. Die Wärme zu spiern, dess Helle zu genieße. Schun fängt es ibber all oh se bliehe. Merr fiehlt sich so wohl, kennt singe vor Glick.  Es geht uffwärts.   Merr spierts in alle Knoche. Merr hot widder Lust, ebbes zu mache. Im Gaade, im Haus, merr will Verännerung. Endlich Freiheit, merr braucht koon dicke Jack mehr, muss die Kinner net ständich ermahne, vun weche warm ohziehe, sunst  verkält ihr eich.  Ach, es is so schee, de Friehling zu spiern, zu rieche, zu schmecke. Sparchele, es gibt widder Sparchele. Was e Freid un die Erdbeern wern aach so gonz longsam rot un dick.  Die Leit sin aach irchendwie freundlicher. Ibberall lächelnde Gesichter. Selbst die Vöchel singe lauter, es geht vun Ast zu Ast  – Tirili, Tirilo, de Friehling is widder do.

Es Marktfriehstick om Dom, do genießt merr de Friehling, die Wärme. Glücklich, dess merr sich widder treffe,  im Freie sitze, babbele, Fleischworscht esse un beim gute Woi de Morje genieße konn. Em Dom gefällt dess, der schmunzelt. Endlich widder mol was los. Ach ja de Friehling. Er macht alles widder nei. Nur mich, mich macht er net nei. Ich werr älter und leider sieht merrs aach. No ja, abber de Onnern geht es jo aach so. Nix währt ewich. Nur de Friehling, der bleibt uns immer un dess is doch e doll Sach. Also herzlich willkomme, lieber Friehling.

Teilen